झोप

दुपारी माझा सूर्य उगवे
मावळतीची नसे निश्चित वेळ
जाग आल्यास झोपी जाण्याचा
असाच आहे माझा हा खेळ

सकाळी उठवून म्हणते आई
शाळेला जायचंय कर घाई
दोन मिनिटांत उठतो म्हणुनी
माझी स्वारी झोपून जाई

कविता पाठ होत नाही
कडवे किती बडे बडे
झोपेत बनवे मी कित्येक गाणी
आनंदी आनंद गडे

संगीताचे जसे असतात सूर
तसेच असे माझे घोरणे
जी कुंभकर्णाची तत्वे होती
तीच आहेत माझी धोरणे

मला सारखी झोप येते
त्यावर काही नाही उपाय
तुम्हीच सांगा मंडळी आता
मी नेमके करू काय?